1 Timothy 3
Dagi herevadia
1Ina hereva na momokani: tau ta ese heitatao dagina baine tahua, ia na dagi namona baine ura henia. 2Taunabunai, heitatao tauna na basie habadelaia diba baine namo; ia danu hahine tamona adavana, boga-auka tauna, aonega tauna, kara manada tauna, heabi-dae tauna, hahediba mai dibana tauna. 3Vine ranuna basine inu momo; basine heatu; baine ḡaukara mai manauna ida; basine heai; moni basine mata ḡaniḡani heni. 4Iena ruma baine reḡua namonamo, natuna danu baine reḡudia, bae kamonai henia bona bae matauraia; 5badina be tau ta ese ena ruma korikori taudia basinema reḡudia diba, Dirava ena ekalesia oreana ede bema reḡua toma? 6Ekalesia tauna matamatana ese ina dagi do basine abia, baine hekokoroku bena diabolo ena hedibaḡani ese baine butua tao na garina. 7Ia harina baine namo murimuri taudia ediai, haida ese bae habadelaia bena diabolo ena idoa ai baine keto na garina.8Diakono danu unu bae heto: bae matau; basie udu mauri; vine ranuna basie inu momo; moni basie mata ḡaniḡani heni; 9Iesu ibadinana herevadia bae badina mai lalodia ḡoevadia ida. 10Bae dibadia guna; bena ta basinema habadelaidia, diakono karana bema kara. 11Adavadia danu bae matau, basie ere dika, bae boga auka, ḡau iboudiai bae heabidadama. 12Diakono na basie hodara; natudia bona edia ruma taudia bae reḡudia namonamo. 13Badina be diakono ḡaukarana e karaia namonamomu taudia na taunimanima ese bae matauraidia, bona Keriso Iesu ikamonaina ai bae goada balaheni.
14Ini hereva na tore henimumu; ḡau tamona na helaromu baina vasi haraḡa na tomu. 15A bama halahe, ini amo boma diba taunimanima na ede bae kara toma Dirava ena orea lalonai; Mauri Diravana ena ekalesia bunai, hereva momokani duna bona badina.
16Momokani, eda Dirava ibadinana herevana hehunina na bada:
Tau anina ai e hedinarai;
Lauma ese maorona e gwauraia;
Aneru ese e itaia;
Bese idau-idau bogaradiai e harorolaia;
Tanobada ai e kamonai henia;
Hairai ai e abia dae.
Copyright information for
MEU